黄子华 栋笃笑入边D经典语录：

爱情 
白雪公主，几咁纯洁无瑕。但系谂真啲，白雪公主，识得嗰个系王子，灰姑娘识嗰个又系王子；有个有特殊嗜好，钟意锡青蛙嘅女人锡咗只青蛙一咁，只青蛙变出嚟嘅又系王子！有冇人谂过根本个王子系同一个人呢？根本呢个王子都不知几花心，周围沟女，重无良到扮青蛙去沟添！ 


情窦未开 
我第一次恋爱之前，我认为自己就系杨过，而我同书里面个杨过唯一唔同嘅地方，就系佢有只大雕。而我嗰阵，就钟意捻呢个相思同画眉多啲。同杨过一样，我从来冇谂过要考第一。我只需要爱情，只要搵到我嘅小龙女，我就可以抛弃学业，退隐山林，搬入新界住。但系我一定要住西班牙别墅，我唔住得村屋，我怕蛇虫鼠蚁。然后每个月至多出一次市区，不过我唔会逗留得耐，问亚妈攞完零用钱我就会入番入去。冇错，基本上，我由中一至中五都系喺呢种咁超然嘅思想下度过。嗰阵时学校最流行嘅辩论题目系：“中学生应否谈恋爱？”我认为，我哋应该辩论嘅系“中学生应否读书？”而喺我第一次恋爱之前，我嘅小龙女只需要一个条件，就系靓，我知我咁样谂好肤浅，但系嗰阵时我重细，唔知道原来身材都好重要架。 


性 
圣人话:“食色性也！”食同色，好唔同！一个人无论几钟意食，会唔会畀几十蚊入戏院睇套“蒸气腾腾小龙包”？一个人无论几钟意食，又会唔会为咗望一嚿冇包住嘅牛肉望 
到畀车撞？ 


爱情 
恋爱唔系PART-TIME，你唔可以话：“爱！做完咪走啰！”恋爱系一盘生意，你要二十四小时谂住佢。自己生意，冇所谓PART-TIME正识。人哋放假或者过年过节，你更加要开OT添。行花市啦行海边啦睇戏食饭啦……你有乜嘢竞争对手呢？我冇竞争对手？！你估你系专利巴士公司啊？港巴都执咗啦！有冇考虑结婚？咁就要向公众交代，咁就即系上市啦！所以，“中学生应否谈恋爱”唔系问题，问题系“人类应否有两份全职工作？”你再拍拖，需要知会你老板：“老细，我出面搵咗份恋爱，我真系好需要呢份恋爱，不过公司啲嘢我会照做，我兼顾到架。”然后你老板会话：“咁你不如搵多份恋爱，咪直情唔使返呢份工啰！” 


新鲜 
依家啲人沟女，对条女最大嘅要求系乜啊？唔系靓，最紧要，系够新鲜！乜嘢叫做够新鲜啊？就系话，沟咗一年嗰个，就唔够沟咗半年嗰个咁正。因为半年嗰个新相识，新鲜啲。同样，沟咗半年嗰个，就唔够三个月咁正。沟咗一个月就唔够半个月嗰个咁正。沟咗一日就唔够半日嗰个正，如此类推，终于……沟咗嗰件，就唔够未沟嗰件咁正！咁即系点呢？重沟唔沟好呢？一沟就唔正？！ 


女人伟大 
黄：喺爱情之中，女人最伟大！ 
男人嘅牺牲，就为咗追求美丽；而女人嘅牺牲，就只系得到一个麻甩佬！而最伟大嘅 
系佢哋根本唔觉得系牺牲。 
如果你话畀一个女人听：“喂，你男朋友有口臭！” 
张：车，人梗有局部缺点嘅！ 
黄：佢重有臭狐同香港脚喎！ 
张：噉佢咪好平均咯！ 
黄：佢啲鼻鼾声唔使较咪啊！ 
张：我男朋友一定系梦见我，我开心。 
黄：佢屙尿乱咁啡！ 
张：好壮啊！ 
黄：佢啡完唔洗手！ 
张：边有男人洗手架！ 
黄：我有！ 
张：乸型！ 
黄：佢重讲粗口啊！ 
张：但系佢心地好！ 
黄：佢喺电梯度食烟喎！ 
张：公众场合都唔畀食咯，佢咪呢埋一边食啰，你哋重想点啊！你系咪想逼死 
佢？！系咪想逼死佢？！呜～～～ 


责任何在 
如果你话我听，因为我唔靓仔，所以唔可以做戏，你唔应该话我听！因为唔关我事，我唔应该负呢个责任，你应该同我父母讲，系佢哋搞成我咁嘅。如果你要罚，应该罚佢哋。以后，边个丑样，就罚佢爸爸妈妈唔准做戏！或者剩系做茄呢啡！我唔系一个唔负责任嘅人，为我爸爸妈妈嗰短短一刹嘅快感，我已经负责负咗廿几年。你估做我好易做啊？我细个读书唔好，或者唔合格，我冇要父母负责。我自己签晒啲成绩表嘅。每当我爸爸妈妈有争执闹交嘅时候，我有冇叫佢哋为咗我嘅童年着想，忍下对方？冇！我叫佢哋出街闹！ 
我大个咗，唔知应该信边个宗教，唔知做人为乜，唔知人生事业嘅方向都冇要求父母照顾我。反而系我调番转头，提醒佢哋：你哋要搵钱啊，积谷防饥啊，唔系第日老来无依无靠 
啊！……乜嘢都系我！ 


男仔唔使靓仔 
靓仔系唔系真系咁重要啊？有啲人话男人唔驶靓仔嘅，有才华咪得啰。系，你有冇试过带你嘅才华去落disco识女仔啊？人哋啲靓仔一行入去，唔使二十分钟，就已经同啲女仔互相问问题：“你度定我度？”我带住我嘅才华入到去，几艰难先搵到个女仔肯畀个机会我。唔系畀机会我交换问题，而系畀机会我天才表演。唱歌跳舞做话剧讲大话功夫表演，成套欢乐今宵一个人做一次…… 等到个女孩看上我的时候，我已经没力了！

泳池 
黄：去公众泳池嗰啲唔系叫做游水，嗰啲叫做浸水。因为喺公众泳池游，只可以用一 
种泳式，就系弹式，同一个位，弹下弹下。 
张：如果系高手可以用式，但系要潜落水底嗰度用。 
黄：点解香港啲泳池咁鬼逼嘅呢？ 
张：唔好问啊，趁人多你好快啲浸下。等阵所有人上晒水嗰阵，你就会发觉，个池啲 
水原来到膝头哥架咋！你去浸脚指啦，下次。 
黄：其实我哋香港人都习惯咗人多，去浸下水都好。但系可惜嘅系，呢啲水，唔系一 
般水，呢啲系暖水！你成日喺泳池度，你会发觉有啲人，全身唔喐，眼碌碌。 
张：哦！你喺泳池屙尿，咁冇公德心！由细到大我老豆都教我架啦，急尿，去隔离池 
吖嘛！ 
黄：所以我喺度，趁呢个机会，同你啲儬仔讲啊！游游下小童池就走过嚟大人池，擒 
喺个池边，唔好话我听系学游水啊！ 
张：特别系擒正喺喷水口嗰啲啊！想毁尸灭迹啊！ 


改名 
改名，只系啲父母将自己嘅主观意愿套喺啲仔女身上。所以大部份女仔唔系叫美乜就系丽乜。男仔唔系叫阿坚，就系阿强，一唔系就叫阿祥。咁我哋系咪好美丽，好坚好强好长呢？ 


黑白不明 
我非常欣赏邓小平嘅“黑猫白猫，捉到老鼠就是好猫。”我老友阿雄个老婆生仔，生咗个黑人出嚟，我都系咁对佢讲：“黑仔，白仔，快高长大就系好仔！” 


闹人 
以前我哋笑人，会话：“你有得发达？太阳由西边出嚟啊！”依家我哋就会话：“你有得发达？建筑面积等于实用面积啊！”又或者话人丑，现在我哋都会技巧好多：“你唔丑，你点算丑啊，你系块面唔多实用咁解嘛。你嘅鼻台太大，啲眼耳口鼻咪唔见使啰。” 


失恋 
失恋系会令人成长嘅。我失恋之前，一向都觉得世界上所有问题都有答案。点解我哋每日都要8点钟起身返工啊？因为够钟啰！点解我哋有够钟呢样嘢啊？因为我哋唔用浮动上班时间啰。点解呢个世界有战争？因为我哋有武器啰。咁点解我哋要有武器啊？因为佢哋有武器啰。一切都有答案，直到我失恋。阿珍，点解你唔爱我？阿珍畀咗一个经典嘅答复我，佢话：“爱情系冇点解架，系唔可以解释架，唔好问啦。”（记紧呢句啦）如果番学阿sir问我嘢都可以咁答就好啦！“黄子华，物体燃烧点解需要氧气啊？”“阿sir，系冇点解架，系唔可以解释架，唔好问我啦！” 


隆胸 
叶子楣简直为演艺界创下新标准。以后啲女仔想做明星，又唔使睇样，又唔使睇演技，去磅啦！！！（加强语气）得，入去磅一磅就得啦。“开嚟，六斤半，片酬系六千五蚊一日，小姐做唔做？”“开嚟，八斤有疤痕，八千减一千疤痕费，即系7千蚊一日。”你话几客观呢！ 


放假 
黄：一般人都会好珍惜每年一度嘅年假！ 
张：今年我要去夏威夷游下水。 
黄：如果你决定去夏威夷，你就要预咗付出沉重代价！前四后六！ 
张：我讲紧系年假，唔系产假啊，子华！（真系啊……） 
黄：前四后六嘅意思系，喺你放假之前嗰四个礼拜，同你放假之后六个礼拜，都要做 
到仆街！（死未）因为无论你放几耐假，你嘅嘢始终系你做番。 
张：系你嘅始终系你嘅！ 
黄：唔单止，放完假，唔系你嘅都会变成系你嘅！  

演戏天份 
我从小就知道，我系一个伟大嘅演员。人哋细个成班细路群埋，钟意玩扮结婚，扮爸爸妈妈。我细个，就钟意扮奸夫淫妇。但系唔知系咪我个样比较老实，我系从来都冇机会扮奸夫。每次我都系扮淫妇……嘅老公。虽然系咁，虽然，我亦都系成班人之中最细嗰个。但系我已经可以将一个妒忌嘅男人心态表现得淋漓尽至。当然，我啲朋友个个都赞我，话我天生出嚟，就系戴绿帽嘅。 

死亡 
细个嗰阵，我系唔怕死嘅。我觉得，系以前啲人先会死嘅。系历史书里面嘅人至会死。好多人唔明历史有乜用，历史咪话你听边啲人死咗啰。我从来未睇过一本历史书有提到黄子 

金捞 
点解要带金捞？唔带捞，有乜资格同人讲，时间系宝贵？我嘅时间点值钱呀？（你话系唔系先）嗱，支时针围住行一个圈，12个钟，十几皮嘢，即系为皮几嘢一个钟。你一个钟值几钱啊？几旧水？我点同你一齐食饭啊，大家时间观念咁唔同！唔单止咁，你带捞，表示你个人有幽默感。劳力士，有边个靠劳力搵食嘅人带得起劳力士啊？越带劳力士嘅人就越表示佢唔使用劳力！呢啲，就叫做幽默感啦。 

女爱情观 
女仔对爱同钟意有好大嘅分别，如果个女仔知道个男仔钟意佢呢，佢都会同佢去吓街，睇吓戏，食吓饭，但想做进一步嘅嘢就唔得啦。而女仔知道个男仔爱佢嘅时候系绝对可以付出更多。喺女仔心目中，钟意等于“帮衬”。但爱喺女仔心目中等于“收购”，收购包括“注资”，然后“合并”……（系呀，系呀！）所以女仔要男仔将佢嘅爱注资落嚟，护口注资落嚟，最重要嘅系钱注资落嚟。然后去买Joyce啦，Panda啦，Gueeo啦，买到一身都系，等佢认为可以巩固佢自己嘅价值，但佢哋系绝对冇得到男方嘅同意架！嗱！我宜家同你哋讲啊，你哋嘅黑箱作业，好容易破坏男方嘅经济架！（你哋都好有共鸣啦） 

男爱情观 
男仔对爱就好随便，爱同钟意都冇分别，只要佢知道你钟意佢，即刻可以带你返屋企，或者去你屋企。系唔系男仔心中冇爱呢？我觉得又唔系喎。系佢哋比其他人更清楚爱嘅定义。爱系乜呢？根据耶苏嘅讲法系：“爱系恒久忍耐又有恩赐，爱系不张狂，不大唤，不作害羞的事，忘记别人的错。”你话啦作为小小男人嘅我哋又点可以随随便便同你讲声爱啊！所以以后有人同你讲爱，一就系佢讲大话（加强语气），二就系有个耶苏喺你面前啊。但耶稣主张爱人如己任，博爱架！ 

自重 
当乜嘢人都唔搵我做嘢，我就知道，我系一个伟大嘅艺术家，在生嘅时候系唔会获得应得嘅尊重。唔止咁，我重伟大过伟大嘅艺术家，因为我知道，我死后都唔会受到尊重。 

红馆 
依家做歌星，好犀利，因为有红磡体育馆。因为呢样嘢，做歌星，可以喺一晚，就赚晒你哋朝九晚五一世人都搵唔到嘅钱啦！啲人话：“我真系唔明张国荣点解要退休。”点解？佢一晚已经搵咗你一世搵嘅嘢，佢一晚已经做咗你一世人要做嘅嘢，重有乜嘢可以做啊？唔退休做乜？做五场，已经轮回五次！做三十场，轮回三十次，如来佛祖都话：使唔使？ 
啲人话，唔系嘅，佢唔舍得退休嘅！佢最后嗰场演唱会，佢自己都喊架。佢系喊，不过唔系为自己喊，系为咗你哋喊啊：“我就退休啦，我听日就唔使DO啦，你哋听日重要 
番九点，唔好迟到啊！！” 

迷惘 
喺公司，老板会同我讲：“你返嚟唔系瞓就系去厕所，你当呢度系屋企啊，呢度系公司啊。”我返到屋企，阿妈又会话：“你重当呢度系你屋企咩，你返嚟唔系霸住个厕所就剩系 
识瞓！”咁……咁我番屋企又唔瞓觉又唔去厕所，返公司又唔去厕所唔瞓，咁我呢啲嘢去边度做啊？不过后嚟我谂过自己又系过份啲嘅，于是我就痛改前非。以后返屋企我就剩系瞓觉，返公司就剩系去厕所。 

老窦 
我一向以为老窦，系option嚟嘅，附加架咋。冇错，大部份人系有老窦嘅，就正等于大部份嘅车系有收音机一样。但系嗰样系option嚟咋嘛，唔系架架车都有。所以我细个嗰阵好憎啲儬仔成日喺我面前话：“我老豆点点点……”我觉得嗰啲人好晒命，就好似你有部车，不停咁同人讲：“我部车开蓬嘎，大包围嘎！”你不如话：“你老窦开蓬嘎，用无铅汽油架……” 

十八岁 
点解十八岁先至系合法年龄呢？因为到咗十八岁，喺法律上我哋就要对自己负责任多余，唔通十八岁之前，我哋就唔使对自己负责咩？唔通十八岁之前，我就可以随时扑出马路：“我唔信啊，我17岁半咋，你敢撞死我？”唔通十八岁之前，我喺油麻地踩完个纹身佬一脚，个纹身佬会话：“死儬仔，你未够十八岁，我忍你！”唉，十八岁嘅最大好处，就系你到咗一个合法嘅做爱年龄。我想请问，有边个做爱系因为合法先做架？我以为大部份人做爱系为咗快感同高潮。抑或你想话我听，十八岁之前做爱系冇高潮嘅，十八岁之前做爱系白做嘅！咁样十八岁就具有特别意义喇！ 

拜年 
呢几年，拜年嘅贺词之中，最流行系边句？祝你——不劳而获。（唔系啩？）恭喜人哋发财当然好，但系发财，都要有方法。有边一个方法，好得过不劳而获？（系咪） 
不劳而获嘅方法就系唔使方法，唔使方法就系最好嘅方法。我哋想发财，已经想到到咗一个禅嘅景界！不劳而获既然可以成为新年贺词，我期待喺未来几年，我哋话人蛇鼠一窝，即系赞佢合群，话人非奸即盗，即系话佢勇敢！哗，真羡慕你呢个家庭，真系蛇鼠一窝非奸即盗。梗系，唔系我哋点会冚家富贵！ 

儿童教育 
我一向都认为，我哋成日呃啲细路仔，懒系nice咁对佢哋，讲到呢个世界乜嘢都好好咁，咁系唔啱嘅。（何解？）细个我同妈妈搭飞机，睇见厕所嘅水系蓝色，我未见过，咪走去问妈妈嗰啲系乜？妈妈话：“系天空。”所以我就成为世界上第一个食过天空嘅人。细个啲大人成日讲童话讲白雪公主。（你都听过啦）佢哋讲嘅就系白雪公主又靓又好 
人，好值得去追求。但系冇讲到我哋唔系白马王子！边个人至系白马王子啊？起码有只白马啦。咁就即系马主啦，你话系唔系啊？讲啲唔讲啲好危险架。即系等如你同个细路仔讲：“小明啊，飞出窗口好过瘾嘅，成个香港望晒架，浮吓浮吓……”但系唔同佢讲：“不过你落到地下个阵，会快过搭电梯好多！” 

用家炒家 
好多人结婚，最初就以为自己系婚姻嘅用家。后来先发觉自己系感情嘅炒家，于是想离婚。但系离婚又要搅几年，睇住周街都系新盘靓盘，自己个盘又放唔出，几难受！